القداس الغريغوري
بسم الاب و الابن و الروح القدس الاله الواحد امين.#فهم_العقيدة
#طقس_كنسي
==============================
القداس الغريغوري
==============================
القداس الغريغوري واحد من أعمق وأغنى الصلوات اللي بتتقال في الكنيسة الأرثوذكسية، وخصوصا في الكنيسة القبطية الأرثوذكسية. القداس ده مرتبط بالقديس غريغوريوس النزينزي، المعروف بلقب "الناطق بالالهيات". هو مش مجرد مجموعة صلوات، لكن هو رحلة لاهوتية وروحية عميقة فيها الكنيسة بتقف قدام الله، وبتعلن إيمانها بالمسيح، وبتقدم له ذبيحة التسبيح والشكر
خليني عزيزي القارئ أخدك واحدة واحدة من البداية تاريخ القداس و إزاي اتكتب و أهدافه، تركيبته، وكمان إزاي الكنيسة بتصليه وليه أوقات معينة، وكمان سر جماله في إنه موجه بشكل مباشر لشخص المسيح (الابن).
==============================
القداس الغريغوري اتنسب للقديس غريغوريوس النزينزي (329 – 390م)، واحد من أعظم آباء الكنيسة في القرن الرابع. هو من كبادوكية (تركيا الحالية)، و هو من اباء كبادوكية الكبار و كان صديق القديس باسيليوس الكبير و القديس غريغوريوس النيسي. غريغوريوس اشتهر إنه "الناطق بالالهيات"، لأنه ركز على سر الثالوث، وعلى لاهوت المسيح بشكل خاص.
والقرن الرابع ده بالذات كان مرحلة مفصلية في تاريخ الكنيسة، لأنه جه بعد انتهاء عصر الاضطهادات الوثني فبقى فيه مساحة لترتيب العبادة الجماعية. والأهم، إنه كان وقت مواجهة تحديات عقائدية كبيرة زي بدعة آريوس اللي أنكرت ألوهية المسيح الكاملة. عشان كده القداس الغريغوري جه كأنه رد ليتورجي حي بيعلن إيمان الكنيسة الواضح بإن الابن هو إله مساوٍ للآب في الجوهر
القداس الغريغوري في الأساس قداس شراكي يعني مش غريغوريوس قعد يكتب نص كامل للقداس من أول السطر لآخره، لكن الكنيسة خدت أجزاء كتير من صلواته وصلواته اللاهوتية لدرجة بتوصل لاغلب القداس الي بنصلي بيه مدموجة بايات ان كانت نصية او اشارات من الكتاب المقدس وحطت كل ده في قالب ليتورجي. النصوص دي اندمجت في القداس اللي إحنا بنعرفه دلوقتي باسم "القداس الغريغوري".
قلت الاغلب لأن في اجزاء اخري من القداس الباسيلي
==============================
مفيش تاريخ دقيق نقدر نقول فيه : "اتكتب سنة كذا"، لكن نقدر نقول إنه اتشكل تدريجيًا في القرن الرابع الميلادي، وقت ما كانت الكنيسة بتجمع تقاليد وصلوات الآباء الكبار (زي باسيليوس وغريغوريوس و غيرهم من الاباء الكبار)
القداس الغريغوري واحد من 3 قداسات رئيسية في الكنيسة القبطية :
القداس الباسيلي (الأكثر اسخدام في الكنيسة) اتجمع في القرن الرابع
القداس الغريغوري (الأكثر شاعرية وروحانية) في القرن الرابع اتجمع
القداس الكيرلسي (الأقدم تاريخيا وراجع لمرقس الرسول نفسه اجزاء كتير منه) لكن القديس كيرلس جمعه و نظمه بالشكل الحالي في القرن الرابع و الخامس
==============================
القداس الغريغوري له أهداف واضحة :
تأكيد لاهوت المسيح : معظم القداس موجه للمسيح مباشرة باعتباره ابن الله.
التعبير عن الشكر والتسبيح : اسمه "أنفورا الشكر".
الاحتفال بسر التجسد والخلاص : بيركز جدًا على إن المسيح تجسد، اتألم، مات وقام لأجلنا.
العيش في حضور الله : القداس مش مجرد تذكار، لكنه حضور حي لله وسط شعبه.
==============================
القداس الغريغوري هو مزيج من :
فيه اقتباسات مباشرة أو شبه مباشرة من الكتاب المقدس (آيات و نصوص كتابية).
فيه تعبيرات ولاهوتيات مستقاة من كتابات الآباء وخصوصا غريغوريوس.
فيه صلوات شاعرية بتعبر عن إيمان الكنيسة بشكل شعبي وروحي.
يعني نقدر نقول إنه مش "مجرد تجميع آيات"، لكنه نص كَنَسي ليتورجي فيه روح الإنجيل، وفيه كمان روح الصلاة الأبوية.
==============================
القداس الغريغوري بيستخدم بشكل رئيسي في الأعياد السيدية الكبرى زي عيد الميلاد، والغطاس، وعيد القيامة، وعيد الصعود، وعيد حلول الروح القدس (العنصرة)، وفي بعض الأعياد الخاصة زي عيد الصليب
ممكن يتقال في المناسبات اللي الكنيسة عايزة تركز فيها على لاهوت المسيح وتجسده.
في الكنيسة القبطية الأرثوذكسية، هو بيُقال بشكل أساسي في الأعياد، و ساعات في بعض المناسبات الخاصة.
الكنائس اللي بتستخدمه :
الكنيسة القبطية الأرثوذكسية.
و بعض الكنائس الأرمنية الشقيقة في الايمان (لأن القداس ليه أصول مشتركة و غريغوريوس قديس معترف بيه عند الكنايس الميافيزية الشقيقة في الايمان)
في الكنيسة القبطية، القداس الغريغوري مش يومي زي الباسيلي، لكنه بيتقال في الأعياد الكبرى. يعني ممكن يتقال حوالي 10 – 12 مرة في السنة، بحسب الأعياد السيدية.
الميزة الأساسية في القداس الغريغوري :
الصلاة فيه موجهة بشكل مباشر للابن (المسيح)
وده بيظهر الفرق اللاهوتي بوضوح بينه وبين القداس الباسيلي. في القداس الباسيلي الصلاة موجهة للآب، من خلال الابن، بالروح القدس. أما الغريغوري فبيخاطب الابن مباشرة باعتباره الله الكلمة المتجسد. وده بيأكد إيمان الكنيسة الأرثوذكسية إن الابن هو "إله حق من إله حق، مساوٍ للآب في الجوهر". يعني كأن القداس الغريغوري بيخلي الشعب يخاطب المسيح شخصيا، زي ما التلاميذ كانوا بيكلموه وش لوش
ودي ميزة لاهوتية عظيمة، لأنها بتأكد إيمان الكنيسة بلاهوت المسيح وبعلاقته المباشرة بينا.
==============================
القداس الغريغوري بيتقسم زي باقي القداسات :
صلاة باكر بعدين صلاة الحجاب ده زي القداس الباسيلي بيبدا
صلاة الصلح من اول ديه بيكون في صلاة مباشرة للمسيح الابن و بيقول الكاهن فيها :
ايها الكائن الذي كان، الدائم إلي الابد، الذاتي، والمساوي، والجليس، والخالق الشريك مع الآب.
الي اخر الصلاة
الأنفورا (رفع الذبيحة).
الاستدعاء الإلهي (إبكليزيس) – استدعاء الروح القدس.
الأواشي (طلبات) والأواشي دي هي قلب الكنيسة المفتوح اللي بيصلي عشان كل الناس. فيها بنطلب من ربنا عشان سلام الكنيسة في كل مكان، وعشان أبونا البطريرك والأساقفة، وعشان الحاكم العادل ، وعشان المرضى والمتعبين، وعشان اللي انتقلوا، وحتى عشان الطبيعة والمياه والزروع. ده بيورينا إن صلاتنا مش أنانية، لكنها صلاة شاملة للعالم كله.
الأقداس (التناول).
وبينتهي بصلاة الشكر الختامية بعد التناول، زي باقي القداسات.
هو مليان صلوات شاعرية اخري، ومن الصعب نحصرها بعدد معين لأنها بتتجزأ ساعات لجمل طويلة زي مثلا بيتقال فيه :
"أيها الكائن الذي كان الدائم إلى الأبد، الذاتي والمساوي والجليس والخالق الشريك مع الآب
انت هو القيام حولك الشاروبيم والسيرافيم، ستة أجنحة للواحد، وستة أجنحة للأخر
أتيت إلي الذبح مثل حمل، حتي إلي الصليب ❤❤
==============================
السمات الأدبية واللاهوتية للقداس الغريغوري هي كتير جدا من التأمل فيه و في جماله :
شاعري جدا : مليان صور أدبية ولاهوتية
لاهوتي : بيوضح علاقة الابن بالآب والروح القدس
شخصي : بيخاطب المسيح بشكل مباشر.
جماعي : الكنيسة كلها بتصلي بصوت واحد.
القداس ليه مكانة خاصة جدا لأنه :
بيركز على المسيح الحاضر وسط شعبه.
بيأكد فكرة "الله صار إنسانًا لأجل خلاصنا".
بيخلي الشعب يدخل في علاقة شخصية مع المسيح.
==============================
تخيل معايا يا صاحبي وانت واقف جوه الكنيسة في يوم عيد كبير والشموع منورة والمذبح مليان بخور والناس كلها واقفة بصوت واحد بترفع قلوبها للمسيح القدوس اللي اتجسد علشاننا وبيبدأ الكاهن يقول أيها الكائن الذي كنت والذي تكون أتيت إلينا على الأرض وصرت إنسان علشان ترفعنا ليك وانت في اللحظة دي تحس إنك مش في زمنك ولا في مكانك كأنك واقف مع التلاميذ في العلية أو تحت الصليب أو قدام القبر الفارغ وتلاقي نفسك بتكلم المسيح مباشرة بتشكره على خلاصه وعلى جسده ودمه اللي بيقدمه ليك وتفهم إن القداس الغريغوري مش مجرد كلمات لكنه لقاء حي وواقعي بينك وبين ربنا يسوع المسيح اللي حاضر وسطينا هو اللي بيجمعنا وهو اللي بيشيل ضعفنا وهو اللي بيحوّل الخبز والخمر لجسده ودمه علشان يبقى جوانا هو اللي بيبدأ الصلاة وهو اللي بينهيها وهو اللي بياخدنا من الأرض للسماء علشان كده كل مرة يتصلى القداس الغريغوري هو مش بس ذكرى لكن هو حب حي بيتجدد وبيفكرك إن المسيح الأزلي الكائن اللي فوق الزمن دخل عالمك وشاركك حياتك علشان يقودك لحياة أبدية معاه ❤❤
والقداس مش بس خبرة لحظة في الكنيسة، لكنه دعوة نعيش حضور المسيح في حياتنا اليومية. زي ما بنخاطبه في القداس ونشكره، نكمل نفس الروح في بيوتنا وشغلنا وصلواتنا الشخصية. لأن اللي بنعيشه جوه الهيكل مش بينتهي بخروجنا من الكنيسة، لكنه بداية لشركة يومية مع المسيح الحي اللي حاضر وسطينا
ده ترتيب القداس و صلواته تقدر تقراها من هنا :
كتاب الخولاجي في الكنيسة القبطية الأرثوذكسية (كلمات القداس الإلهي).
https://st-takla.org/Lyrics-Spiritual-Songs/Words-of-Coptic-Alhan-Tasbeha-Kodas/Arabic-Coptic-Liturgy-Lyrics/Arab-Copts-Mass-Book-003-index-Al-Koddas-Al-Ghreghory.html
==============================
بركة و سلام ملك السلام تكون مع جميعكم .
#فهم_العقيدة
#طقس_كنسي
اكتب رأيك في هذه المقالة