انا مش عارف ازاي ممكن اثبت لحد اي دين كان اغلبية او اقلية في قرون مكانش فيها تعداد سكاني او خانة ديانة في البطاقة
لكن اللي احنا متأكدين منه ان المسيحين مكانوش الاغلبية الساحقة اللي ممكن تطوع الحاكم لمصلحتها (اكتر من 60%)
لكن ممكن تكون كام......1% .......5%................20%........50%؟؟؟
محدش يقدر يخمن
لكن هحكيلكم شوية مواقف تاريخية ممكن تحددلك حجم المسيحين وقتها
في عهد الامبراطور تارجان 98م-117م
كان فيه محامي و عضو في مجلس الشيوخ اسمه بليني الصغير ....بعت للامبراطور يشتكي له ان المقاطعة و الشارع اللي عايش فيهم اتملوا مسيحين و الاقبال علي الديانة بقي جماهيري جدا .....فيرد الامبراطور يقوله اه و الله يا بليني يا اخويا ده اسيا الصغري اتملت مسيحين برضو و الوضع خرج عن السيطرة ..انت رأيك نعمل ايه تيجي نعمل اضطهاد
و بدء بليني يسن مع تارجان ازاي تكون عقوبة المسيحي في حال كان عبد او حر او طفل او شيخ
و ده يأكدلك ان المسيحية كانت اقلية علي وشك انها تكون اكثرية لو خدت شوية و قت و حرية رأي يعني ممكن تكون ل30%-40% و قابلة للزيادة
و الاضطهاد بس كان هدفه يحجمها مش اكتر
مكسيميانوس التراقي سنة 235 الي 238 م
و الامبراطور الروماني ده عمل حاجة غريبة جدا فهو مكانش بيضطهد المؤمنين المسيحين و لكنه فقط مكن الشعب الروماني من اضطهادهم
يعني اي حد يرتكب في المسيحين اي جريمة ميتحاسبش
و هو من جهته كان بيضطهد و بيقتل الاساقفة بس
و ده اذا دل علي شئ و هو اكثرية المسيحين وقتها لدرجة ان الدولة متقدرش تجري ورا كل مسيحي ....معناها انهم اكتر من 10% و اقل من 40%
و لو هم اكتر من 40% فغالبا لا يمتلكوا اسلحة او يقدروا يحاربوا الامبراطورية الرومانية
ديسيوس 249 الي 251 م
و ده نزل مرسوم لاستعادة هوية الدولة الوثنية و اضطهادات المسيحين لأنهم هما اللي مضيعينها .....و ده يأكدلك ان الشارع الروماني نفسه بدء يتغير و ان الهوية الوثنية ضاعت في المجتمع الروماني بسبب المسيحين
اورليان 270 -275 م
و ده عمل اغرب حاجة ممكن تتخيلها
و هي انه نقل عيد اله الشمس ابولو من 25مايو ل25 ديسمبر
و دي حاجة المؤرخين اختلفوا في سببها و لكن اقرب سبب متوقع
هو انه حب يزاحم المسيحين بحيث ان لو المسيحين قرروا يحتفلوا ميبقاش ليهم وجود في الشارع
و هنا انت بتتكلم عن جماعه قد تكون تخطت ال50% لدرجة انها مزاحمة الرومان في الشارع
كل ده و احنا لسه متكلمناش عن حكم دقلديانوس اللي اتقتل فيه 840 الف شهيد
انت عارف انك لو حطيت فرضية ان قدام كل شخص استشهد فيه قدامه 50 شخص ما بين انكر الايمان او هرب
هيكون عندك 40 مليون مسيحي ما بين هرب و انكر الايمان
في وقت تقدر اعداد الامبراطورية الرومانية نفسها في عهد دقلديانوس ب49 مليون نسمة
طبعا مستحيل يكون المسيحين 40 مليون و لكن دده معناه ان نسبة المقبلين علي الاستشهاد هتكون 1 الي 20 او الي 30
لكن في الواقع تنصير الامبراطورية المسيحية حصل بشكل تدريجي واضح جدا و منطقي جدا و الزعم ان المسيحية كانت اقلية منبوذة وقتها دي خرافة بيروجلها المسلمين و الملحدين علشان يشيعوا ان الايمان المسيحي انتشر بعد حكم قسطنطين
===========================
مصدر كل المواضيع ديه سير الاباطرة هتلاقيها في اي مكتبة بحث شاملة زي ويكيبيديا انجلش أو كتابات المؤرخين عن حياتهم في عرض وضع المسيحين ما قبل المرسوم زي يوسابيوس القيصري في تاريخه الكنسي او العلامة لاكتانتيوس او المؤرخ روفينوس الاكويلاني ف تاريخه الكنسي و غيرهم
منقول مع إضافات مني من ألاخ المحبوب ConConstantine Theodosius
اكتب رأيك في هذه المقالة