هي معجزة بتقول ان كفار قريش سألوا الرسول يعملهم معجزة علشان يأمنوا بيه
فقالهم بس كده قام شاقق القمر نصين و رجعه تاني
و لما شافوا كده قالك ده محمد سحرنا و اللي شوفناه ده خيال و لا شق قمر و لا حاجة و انهم قالوا لو حد من القوافل عدا و قالنا انه شافوا اتشق فعلا هنصدق ...فعدت قافلة و شهدت علي انشقاق القمر و مصدقوش برضو
القصة دي موجودة في الاحاديث بتاعت انس بن مالك في صحيح البخاري قلك :
أن أهل مكة سألوا رسول الله صلى الله عليه وسلم أن يريهم آية فأراهم القمر شقين.
و ابن مسعود في صحيح مسلم قلك :
انشق القمر على عهد رسول الله صلى الله عليه وسلم شقتين.
و بردو عن ابن عباس
اما القرأن مش بيحكي كل التفاصيل دي بالتدقيق و لكن نقدر نقول انه حكي عنها لو حبينا نفسره علي مزاجنا
{ اقتربت الساعة وانشق القمر } (القمر:1)
لكن معجزة انشقاق القمر هي اكتر معجزة ممكن تثبتلك ان الرسول ده بيكدب
لعدة اسباب :
اولهم انشقاق القمر دي معجزة لازم نص الكوكب يكون حاضرها لأن الليل في نص الكوكب و النهار في نص الكوكب التاني
انت متخيل كمية شهود المعجزة دي اللي هيكونوا من الامبراطورية الفارسية اللي بتراقب النجوم و الفلك 24 ساعة
مصر كذلك ...كل اللي في البحر المتوسط ....روما والحبشة و يمكن نص العالم القديم كله حضرها
مش غريبة ان مفيش شاهد واحد علي الظاهرة دي.القمر ينشق قدامك و يرجع مكانه تاني
الاغرب ان المسلمين في كل مراسلاتهم و حتي في رسايل الرسول المزعومة لهرقل امبراطور بيزنطة و المقوقس كيروس حاكم و بطرك الخلقدون في مصر مقالش انه هو اللي عملها
ازاي يبقي دليل من ادلة نبوة الرسول ميعلنش عنه و يراهن بيه
التلاميذ في المسيحية كانوا بيبشروا بقيامة المسيح لأنهم كانوا قادرين يعملوا معجزات و لأنهم شافوا يسوع بعينهم واحد زي توما قلك مش هصدق اي حد فيكم غير لما المس المسيح بنفسي في جراحه عشان كده المسيح ظهرله و خلاه يلمس جراحه (يوحنا ٢٠ : ٢٤-٢٩) و مريم المجدلية معرفتش ان المسيح يبقي البستاني لما ظهرلها باتضاع بعد القيامة مش مجرد وهم لأن لو وهم من اول شخص غريب شافته حتي لو ملامح بسيطة من المسيح هتقول هو ده لكن معرفتهوش بل افتكرته اخذ جسد المسيح من القبر (يوحنا ٢٠ : ١٤-١٥))
بجانب إنه ظهر ل ٥٠٠ من المؤمنين (كرونثوس الاولي ١٥ : ٦) و اكل معاهم سمك (لوقا ٢٤ : ٤٢) فا الرسل شافوا يسوع لمسوه و عملوا معجزات و تبشير باسمه
مش غريبة ان الرسول مش قادر يبشر بمعجزة هو عملها و محدش جاب سيرتها
==========================
السبب التاني انك لو درست فيزيا و جيولوجيا بربع جنيه مخروم
هتعرف ان القمر له دور في دوران الارض بيتحكم في المد و الجذر في البحار و المحيطات
يعني ده لو انشق هتحصلك كمية مصايب كونية علي كوكب الارض
اولها فياضانات و انحسارات للبحار في العالم كله
فغريبة ان السنة دي المفروض التاريخ يسجلنا عن اي مدن غرقت في العالم كله او سواحل جفت لكن مفيش أو أي كوارث طبيعية زي مسجل قبل انتشار طاعون جستنيان قبل بأقل من قرن سنة ٥٣٦ ميلادية تقريبا الكوارث الي حصلت بسبب انفجار بركاني في الغالب في ايسلندا اذي الغلاف الجوي للارض و سبب مجاعات في جزء مش قليل من الكوكب و هي مع الطاعون قتلا ملايين البشر.
فيه اللي هيقولي صوروا القمر و لقوا فيه تشققات
التشققات و التصدعات موجودة في كل القشر الارضية علي الكواكب
نتيجة قوة الجاذبية اللي في نواة كل كوكب و كويكب
طب ما الارض فيها تشققات هل الارض كمان انشقت و المريخ فيه تشققات هل المريخ كمان اتشقق
و خد بالك التشققات دي كلها مش في خط موازي واحد علي القمر دي في اماكن متفرقة و تعتبر نقط في بحر بالنسبة للقمر و كمان بخصوص ده رد علي الكذب الي انتشر بعد ما وكالة ناسا نشرت صورة من مهمة ابولو لمنطقة (ima Ariadaeus)على النت بدأت تنتشر بين بعض المجتمعات المسلمة أونلاين حيث تم تفسير ما سُمّي بخط انشقاق القمر على أنه دليل إن القمر انشق في وقت قبل كده
لكن ناسا وضّحت إن الصورة بتظهر أخدود قمري (rille) مشابه للصدوع الجيولوجية على الأرض و بيمتد لحوالي 300 كيلومتر.
وشرح عالم الفلك بول جروت من جامعة Radboud إن الانشقاق الظاهر في الصورة لا يحيط بسطح القمر بالكامل، ومن المحتمل إنه مرتبط بالاصطدام اللي كوَّن فوهة Tycho crater القريبة من المنطقة. بالإضافة لكده قال عالم ناسا اسمه براد بيلي رد علي احد الأشخاص الي سأله بخصوص ده بسبب كثرة الاكاذيب في الصفحات الإسلامية قله الاتي :
توصيتي لك لا تصدق كل شئ تقرأه على الإنترنت. الأبحاث العلمية المُحكَّمة (Peer-reviewed) هي المصادر الوحيدة الموثوقة علميا. لا يوجد أي دليل علمي يثبت أن القمر انقسم ثم عاد و تم تجميعه مرة أخرى في أي وقت في الماضي.
راجع :
https://web.archive.org/web/20140419014134/https://sservi.nasa.gov/?question=evidence-moon-having-been-split-two
https://web.archive.org/web/20100316162638/http://www.nasa.gov/mission_pages/LRO/multimedia/lroimages/lroc_20090928_ariadaeus.html
https://web.archive.org/web/20230805180706/https://factcheck.afp.com/doc.afp.com.328Y6DA
==========================
السبب التالت هي ان المفسرين المسلمين بعضهم بينكر المعجزة دي و بيقول ان معني الايات دي مش معجزة و لكن تفسيرها ان شق القمر هيحصل لما تقوم القيامة.
وكذا قال القشيري . وذكر الماوردي : أن هذا قول الجمهور ، وقال : لأنه إذا انشق ما بقي أحد إلا رآه لأنه آية والناس في الآيات سواء .
وقال الحسن : اقتربت الساعة فإذا جاءت انشق القمر ( بعد النفخة الثانية ) .
وقيل : وانشق القمر أي وضح الأمر وظهر .
وقيل : انشقاق القمر هو انشقاق الظلمة عنه بطلوعه في أثنائها ، كما يسمى الصبح فلقا لانفلاق الظلمة عنه .
وقد يعبر عن انفلاقه بانشقاقه كما قال النابغة : فلما أدبروا ولهم دوي دعانا عند شق الصبح داع
إذن فالرواية البخارية ليست محتمة القبول . خاصة أن الحديث الذي روى معجزة انشقاق القمر المنسوبة للنبي محمد هو آحاد ، وحديث الآحاد مما لا تثبت به عقيدة على قول الجمهور ؟
يُقرِّرُ الأشاعِرةُ أنَّه لا يَجوزُ الاسْتِدْلالُ بخَبَرِ الآحادِ في بابِ العَقائِدِ؛ لأنَّ أخْبارَ الآحادِ ظَنِّيَّةُ الدَّلالةِ، ولا تُفيدُ اليَقينَ، وإنَّما يَجوزُ الاسْتِدْلالُ بها في الأحْكامِ الفِقْهيَّةِ . (تمهيد الأوائل وتلخيص الدَّلائِل) للباقلاني (ص: 445)، (مشكل الحديث وبيانه) لابن فورك (ص: 44، 367)، (الشامل في أُصول الدين) للجويني (ص: 557)،
قالَ أبو المَعالي الجُوَينيُّ: (أمَّا الأحاديثُ الَّتي يَتَمَسَّكونَ بها فآحادٌ لا تُفْضي إلى العِلمِ، ولو أَضرَبْنا عن جَميعِها لَكانَ سائِغًا، لكنَّا نُومِئُ إلى تَأويلِ ما دُوِّنِ مِنها في الصِّحاحِ) . (الإرشاد إلى قواطع الأَدِلَّة في أُصول الاعْتِقاد) (ص: 181).
وقالَ الرَّازِيُّ: (أخْبارُ الآحادِ مَظْنونةٌ، فلم يَجُزِ التَّمسُّكُ بها في مَعْرِفةِ اللهِ تَعالى وصِفاتِه، وإنَّما قُلْنا: إنَّها مَظْنونةٌ؛ وذلك لأنَّا أَجمَعْنا على أنَّ الرُّواةَ ليسوا مَعْصومينَ) (أساس التقديس في علم الكلام) (ص: 127). و(المَطالِب العالية من العلم الإلهي) للرازي (9/ 201 - 214).
==========================
دلوقتي ممكن شخص يجيلك يهري و يحاول يدي انه في دليل تاريخ يثبتها و ده من الترقيعات الفارغة لكن نستعرضه و نرد عليه .
الأسطورة بتقول إن ملك من مالابار (الهند) اسمه تشيرامان بيرومال او راجا بهوج شاف المعجزة وسافر للرسول وأسلم.
الحقيقة بقي ان مفيش أي سجل تاريخي هندي رسمي من القرن السابع بيقول الكلام ده. الأسطورة دي ظهرت لأول مرة في كتاب اسمه "تحفة المجاهدين اتكتب في القرن الـ 16 (يعني بعد الواقعة بـ 900 سنة).
التواريخ مش راكبة راجا بهوج اللي ساعات بيذكروا اسمه، ده ملك عاش في القرن الـ 11 (بعد الرسول بـ 400 سنة). أما بيرومال فالتاريخ الهندي بيقول إن عهده كان في القرن التاسع يعني بعده بقرنين يعني مفيش ولا ملك هندي سافر ولا وثق ولا الكلام ده كله.
نيجي لكذبة اخري في الترقيع ان كتير بيستشهدوا بمخطوطة في المكتبة البريطانية (رقم 2807) وبيروجوا إنها دليل قاطع
لكن الحقيقة ان المخطوطة دي قصة شعبية (Folklore) مجهولة الكاتب، واتكتبت في وقت متأخر جدا عشان تبرر وجود الإسلام في منطقة مالابار وتديله صبغة شرعية قديمة. المؤرخين اللي فحصوا السجلات الهندية (زي النقوش على المعابد والعملات) ملقوش وجود لقصة انشقاق القمر دي خالص من أساسه
بخصوص الهند بقي الدارس بحق لفترة الشرق الاقصي وقتها هيلاقي الهند والصين في الوقت ده كان عندهم علماء فلك مهنتهم بس مراقبة النجوم والقمر وتسجيل الكسوف والخسوف وأي حاجة غريبة في السماء.
لو ملك شاف القمر اتشق كان المنجمين بتوعه (المنجم وقتها كان هو عالم الفلك) سجلوا ده في سجلات القصر كحدث كوني مرعب لكن السجلات الصينية والهندية والهندوسية بيضا خالص من أي ذكر للحدث ده.
و كمان العرب زمان كان تاريخهم مرتبط بالأحداث العظمى (زي عام الفيل).
السؤال المنطقي هنا لو القمر اللي هو أهم حاجة عند العرب في شهورهم وتنقلهم اتشق نصين ليه مسموش السنة دي عام الانشقاق ؟ ليه ملقيناش قصيدة واحدة من المعلقات أو شعراء المخضرمين بتوصف المنظر المهيب ده ؟ (العرب كانوا بيوصفوا الناقة والخيمة، فما بالك بالقمر لو اتشق ؟).
و عندك القرآن في سور تانية بيقول: {وَمَا مَنَعَنَا أَن نُّرْسِلَ بِالْآيَاتِ إِلَّا أَن كَذَّبَ بِهَا الْأَوَّلُونَ}. دي آية صريحة بتقول إن ربنا وقف إرسال المعجزات المادية (زي ناقة صالح) لأن الناس كدة كدة مش هتصدق.
ده بيعمل تضارب او (Contradiction)؛ إزاي القرآن يقول مفيش معجزات مادية خلاص، وبعدين تحصل أكبر معجزة مادية في تاريخ البشرية وهي شق القمر ؟
و كمان ده شئ بسيط لاي قارئ بخصوص المسافات الكونية ان القمر بيبعد عن الأرض حوالي 384 ألف كيلومتر. عشان شخص في مكة يشوف القمر مفصول والمنظر يبقى واضح (نص يمين ونص شمال وجبل حراء بينهم زي ما الرواية بتقول)، ده معناه إن المسافة بين النصين لازم تكون آلاف الكيلومترات في الفضاء.
مسافة زي دي تخلي القمر يظهر مشقوق لكل سكان الأرض اللي عندهم ليل في اللحظة دي. فكرة إنه يكون خداع بصري لمكة بس، بتلغي فكرة إنها معجزة كونية وبتحولها لـتهيؤات أو ظاهرة جوية محدودة، وده بيضرب أصل القصة.
==========================
في النهاية هي مجرد معجزة وهمية لا شاهد عليها غير كاتب القرأن اللي كان بيتقال عليه مجنون اصلا لما كان عايش في مكة (مكان حدوث المعجزة) :
رَأيتُ رسولَ اللهِ صلَّى اللهُ عليه وسلَّمَ مرَّتَينِ: مرَّةً بِسُوقِ ذي المَجازِ وأنا في بِيَاعةٍ لي -هكذا قال- أبيعُها، فمَرَّ وعليه حُلَّةٌ حَمراءُ وهو يُنادي بأعْلى صَوتِه: يا أيُّها الناسُ، قولوا: لا إلهَ إلَّا اللهُ، تُفلِحوا، ورَجُلٌ يَتبَعُه بالحِجارةِ وقدْ أدْمى كَعْبَيه وعُرقوبَيْه وهو يقولُ: يا أيُّها الناسُ، لا تُطيعوه؛ فإنَّه كَذَّابٌ، قُلتُ: مَن هذا؟ فقالوا: هذا غُلامُ بَني عَبدِ المُطَّلِبِ، قُلتُ: مَن هذا الذي يَتبَعُه يَرْميه؟ قالوا: هذا عَمُّه عَبدُ العُزَّى، وهو أبو لَهَبٍ.
الراوي : طارق بن عبدالله المحاربي | المحدث : شعيب الأرناؤوط | المصدر : تخريج سنن الدارقطني
الصفحة أو الرقم: 2976 | خلاصة حكم المحدث : صحيح
التخريج : أخرجه ابن إسحاق في ((السير)) (232)، وابن المبارك في ((الزهد والرقائق)) (1164)، وابن سعد في ((الطبقات الكبرى)) (6/ 114)، وابن حبان (6562) واللفظ لهم.
اكتب رأيك في هذه المقالة