#تاريخ_كنسيالشهيد مينا اخو البابا بنيامين الاول عاش في وقت من أصعب الأوقات على الكنيسة القبطية. سنة 631م، الإمبراطور البيزنطي هرقل عيّن واحد اسمه "كيروس" (اللي التاريخ العربي سماه "المقوقس") بطريرك خلقيدوني وكمان والي على مصر في نفس الوقت، واداله سلطات كاملة عشان يوحّد الكنيسة بالقوة تحت المذهب الخلقيدوني الهرطوقي.
كيروس بدأ حملة اضطهاد وحشية ضد الأقباط اللي رفضوا خلقيدونية. البابا الشرعي للأقباط وقتها، البابا بنيامين الأول (البابا رقم 38)، هرب في الصحرا حوالي عشر سنين عشان ميقعش في إيديه. ولما كيروس حب يضغط عليه عشان يسلّم نفسه، أمر بالقبض على أخوه الصغير مينا، اللي كان علماني شجاع ومتمسك بإيمانه.
جابوا مينا قدام كيروس، اللي حاول يقنعه يوافق على مجمع خلقيدونية و يمضي علي طومس لاون الملعون، ووعده بمناصب كبيرة لو قالّه مكان أخوه البابا. لكن مينا رفض بشجاعة وقال له:
"لن أخون إيماني أو أسلم أبي البطريرك، حتى لو قطعتني إربًا".
الكلام ده ولّع كيروس غضب، فأمر يعذبوه عشان يكسر إرادته. والمؤرخ يوحنا النقيوسي هو أكتر مصدر دقيق نقل لينا الأحداث دي، وبيوصف التعذيب كده :
بالمشاعل : ولّعوا مشاعل نار وكيّوا جنبيه بيها لحد ما الدهن سال من جسمه على الأرض.
قلع الأسنان : ضربوه بعنف لحد ما سنانه اتكسرت وتقلعت.
الجلد : جلدوه بكرباج معمول من أعصاب البقر لحد ما لحمه اتناثر.
الإغراق : ولما كيروس لقى إن مينا مش هيتراجع، أمر يحطوه في خيشة مليانة رمل ويرموه في البحر المتوسط قدام سواحل إسكندرية، وهناك نال إكليل الشهادة غرقان.
==============================
مراجع :
(1) Charles, Robert H. (translator). The Chronicle of John, Bishop of Nikiu: Translated from Zotenberg's Ethiopic Text. London: Williams & Norgate, 1916.Chapters CXIX, CXX
(2) الأنبا يوأنس، الاستشهاد في المسيحية، صفحة 80
اكتب رأيك في هذه المقالة