الرد علي شبهات ان الكتاب المقدس به اخطاء علمية

 

الرد علي شبهات ان الكتاب المقدس به اخطاء علمية

سلام المسيح
كل الادعاءات و الشبهات المتعلقة بالموضوع ده ناتجة عن كذه حاجة اهمهم :
ان الكتاب المقدس بيستخدم لغة مجازية أو رمزية مش لازم تكون علمية بحتة لان الوحي الروح القدس ادي للكاتب حرية التشبيه و الوصف بناء علي فهمه و بيئته لكنه كان بيحفظه من الخطا عشان يوصل المعني الرئيسي للرسالة و للكلام .

الترجمات ساعات بتدي إيحاء مختلف عن المعنى الأصلي في العبرية أو اليونانية او الارامي (هو قليل لكن موجود) بالتفسير و السياق بيتفهم كل شئ

سوء فهم النصوص بسبب القراءة الحرفية بدون فهم المعنى الحقيقي
===========================
لكن هشرح بعض الشبهات المنتشرة عن ده :
هو الارنب بيجتر ؟
الكتاب المقدس في (لاويين 11: 6) بيقول:
"وَالأَرْنَبَ، لأَنَّهُ يَجْتَرُّ، لكِنَّهُ لاَ يَشُقُّ ظِلْفًا، فَهُوَ نَجِسٌ لَكُمْ."
وبيقولوا إن ده غلط لأن الأرنب بيولوجيًا مش من الحيوانات المجترة زي البقر والغنم.

لكن اللي مش فاهمينه إن كلمة "يجتر" هنا مش شرط تكون بمعناها العلمي الحديث (إن الحيوان يكون عنده معدة مقسومة لحجرات ويرجع الأكل للفم). لكن المعنى في العبرية يقصد أي حيوان "بيعيد مضغ الأكل بطريقة ما". والأرانب فعلا عندها طريقة اسمها "Cecotrophy"
، وهي إنها بتاكل فضلاتها الطرية (اللي فيها مغذيات لسه محتاجاها) وتهضمها تاني. فبالتالي، الوصف ده مش غلط، لكنه مبني على فهم القدماء للطبيعة مش المصطلحات البيولوجية الحديثة.
===========================
الأرض ليها أربع زوايا ؟
في (إشعياء 11: 12) بيقول:
"وَيَجْمَعُ مَنْفِيِّي إِسْرَائِيلَ، وَيُفَرِّقُ يَهُودَا مِنْ أَرْبَعَةِ أَطْرَافِ الأَرْضِ."
فبيقولوا إن الكتاب المقدس بيقول الأرض مسطحة وليها أربع زوايا

لكنها مجرد شبهة عقيمة شرحتها في المقالة ديه :
https://siervodejehova1.blogspot.com/2024/09/blog-post_33.html
===========================
حبة الخردل أصغر البذور ؟
المسيح قال في (متى 13: 32) إن حبة الخردل أصغر البذور، وبيقولوا إن ده غلط لأن فيه بذور أصغر منها زي
"الأوركيد

لكن المسيح كان بيتكلم عن البذور اللي بيزرعها الفلاحين وقتها في الشرق الأوسط، مش كل بذور العالم وبالفعل، حبة الخردل كانت أصغر بذرة مستخدمة في الزراعة في اسرائيل، فالوصف صح جدا في السياق الثقافي وقتها
===========================
الخفافيش طيور ؟
في (لاويين 11: 13-19)، الخفاش اتذكر مع الطيور، وبيقولوا ده غلط لأن الخفاش من الثدييات مش الطيور

لكن في التصنيف العلمي الحديث، فعلا الخفاش مش طائر، لكنه زمان كان أي حاجة بتطير تُعتبر طائر، وده التصنيف الطبيعي عند القدماء. فالكتاب المقدس بيستخدم التصنيف الشائع وقتها، مش التصنيف البيولوجي اللي ظهر بعد آلاف السنين بجانب متنساش ان الوحي خلي الكاتب يعبر و يشرح بلغته و ثقافته
===========================
النمل ليه قائد ؟
في (أمثال 6: 6-8)، بيقول عن النمل:
"اِذْهَبْ إِلَى النَّمْلَةِ أَيُّهَا الْكَسْلَانُ، تَأَمَّلْ طُرُقَهَا وَكُنْ حَكِيمًا، الَّتِي لَيْسَ لَهَا قَائِدٌ..."
وبيقولوا إن ده غلط لأن النمل عنده "ملكة" بتنظم المستعمرة

لكن الملكة في مستعمرة النمل مش هي اللي بتصدر الأوامر، بالعكس، النمل بيشتغل بنظام ذاتي بدون قائد فعلي، وكل نملة بتشتغل بناء على الفيرومونات والإشارات الكيميائية، مش بناء على أوامر من "حاكم" زي البشر. فالوصف في الكتاب المقدس دقيق جدا
===========================
النور قبل الشمس ؟
في (تكوين 1: 3-5)، ربنا خلق النور في اليوم الأول، لكن الشمس والقمر اتخلقوا في اليوم الرابع (تكوين 1: 14-19)، فبيقولوا إزاي النور ييجي قبل الشمس ؟

فيه مصادر كتير للنور غير الشمس، زي الضوء الناتج عن التفاعلات الكونية، أو حتى نور مجد الله نفسه، وده اللي كان منور العالم في البداية. بعد كده، الشمس اتخلقت كـ"منظم" للضوء عشان تحدد النهار والليل. فالقصة مش غلط، لكنها بتتكلم عن ترتيب مختلف عن اللي البشر متعودين عليه.
===========================
الكون اتخلق في 6 أيام بس ؟
في (تكوين 1)، بيقول إن الله خلق الكون في 6 أيام، وبيقولوا إن ده ضد العلم اللي بيقول إن الكون تطور في مليارات السنين.

كلمة "يوم" في العبرية
(יום - يوم) مش دايمًا معناها 24 ساعة، لكنها ممكن تعني فترة زمنية طويلة، زي ما بنقول "في أيام زمان"، فممكن تكون الأيام دي رمزية لفترات طويلة مش محددة بالوقت البشري بجانب انه تفاسير كتير جدا بتقول انه الايام رمزية مش واقعية بترمز لمليارات السنين لكنه شبهها بالايام للتبسيط..
===========================
السماء سقف صلب ؟
في (تكوين 1: 6-8)، بيتكلم عن "جلد السماء"، وبيقولوا إن ده معناه إن السماء سقف صلب، وده غلط علميًا.

كلمة "جلد" في الأصل العبري (רָקִיעַ - راقيا) معناها "شيء ممدود"، مش شرط يكون صلب. والكتاب بيتكلم بلغة البشر البسيطة، زي ما بنقول "السماء صافية"، مش معناه إنها حاجة ملموسة
===========================
الأرض اتأسست على أعمدة ؟
في (1 صموئيل 2: 8)، بيقول:
"لأَنَّ لِلرَّبِّ أَعْمِدَةَ الأَرْضِ، وَقَدْ وَضَعَ عَلَيْهَا الْمَسْكُونَةَ."
وبيقولوا ده معناه إن الأرض ليها أعمدة، وده ضد العلم.

التعبير هنا شعري ومجازي، والهدف منه إن الأرض ثابتة بأمر الله، مش إنها حرفيا محطوطة على عواميد ده زي لما نقول "فلان هو العمود للفريق"، مش معناه إنه عنده فقرات حرفيًا، لكن إنه أساس الفريق.
===========================
موت الحشرات بالدم ؟
في (لاويين 17: 11)، بيقول:
"لأَنَّ نَفْسَ الْجَسَدِ هِيَ فِي الدَّمِ."
وبيقولوا إن الحشرات ملهاش دم بالمعنى المعروف، فإزاي الآية دي تنطبق ؟

لكن الحقيقة ان الحشرات كتير منها عندها سائل هيموليمف، وده بيقوم بنفس دور الدم في الكائنات التانية، وبينقل الأكسجين والمغذيات، فالوصف دقيق لأن الحياة فعلًا متعلقة بالسوائل دي.
===========================
في (إشعياء 11: 7)، بيقول
"وَيَرْعَى ٱلْأَسَدُ كَٱلْبَقَرِ ٱلتِّبْنَ."
وبيقولوا إن ده غلط لأن الأسد حيوان آكل لحوم مش عشب

في الحقيقة صاحب الكلام ده مدلس لان الآية دي مش بتتكلم عن الوضع الحالي للأسود، لكنها بتوصف حالة مستقبلية لما يحل السلام و يكون عصر سلام يعني نبوءات فا بتتكلم عن السلام و الوداعة بين الكائنات حتي المفترسة منها .

لان فيه نبوات تانية في نفس الإصحاح بتتكلم عن الذئب بيعيش مع الحمل، والأفعى مش بتؤذي الطفل، فكلها إشارات رمزية عن عالم مليان بالسلام.

حتى علميا، في حالات حصلت فعلا إن أسود أكلت نباتات لما اضطرت، وده مثبت في حدائق الحيوان بالرغم من انه مش من نظامه الاساسي لكن عادي ياكلها.

فا الموضوع مش غلط ابدا بل صح من الناحيتين السياقية بتاعت الكلام
و العلمية مش غلط .
===========================
ديه يعتبر اكتر الاسئلة المنتشرة الي هي اسئلة عقيمة بتعتمد علي مغالطات كتير زي :
تعبيرات مجازية مش علمية.
ترجمة للكلمات العبرية واليونانية بطريقة مش دقيقة.

لكن ميضرش شرحهم .
.
Siervo De Jehová
بواسطة : Siervo De Jehová
"لكي تجثو باسم يسوع كل رُكْبَةٍ" (في 2: 10)
Comments