الكابوس الاول يعقوب الرسول
لو حاولت تقول ان القيامة دي اسطورة اتطورت مع الوقت و التاريخ و ان يمكن قيامة المسيح مكانتش هي العقيدة اللي بينادوا بيها التلاميذ
فيعقوب الرسول اول واحد هيدمرلك الاسطورة دي
لأن يعقوب اول واحد استشهد من التلاميذ في وقت مبكر جدا سنة 44 ميلاديا ....و ده طبعا و هو بينادي بقيامة المسيح بسنين قبلها
لدرجة انه حكم الاعدام عليه جه بس لأرضاء اليهود
اسطورة ايه اللي هتتكون في اسبوعين دي و اول واحد يروح ضحيتها قريب المسيح نفسه
الكابوس الثاني
لو قولت ان الرسل كانوا بيحبوا المسيح بشكل اسطوري لدرجة انهم مقدروش يستوعبوا موته فجاتلهم هلوسه انه لسه عايش و صدقوها
و عاشوا عليها
فبولس هو دليل علي بطلان القصه دي لأن بولس مكانش من التلاميذ اصلا ده امن بالمسيح بعد قيامته بسنين و هو اصلا كان مضطهد للمسيحين
و مشافش المسيح قبل كده علشان يتأثر بيه
فلو الدعوة معتمدة علي العاطفة و الهلوسة و الماضي مكانتش ضمت بولس لصفها
و الكابوس التالت هو بطرس الرسول
لو حبيت تقول ان تلاميذ المسيح حبوا يقضوا مصلحه ياكلوا منها عيش و يبقوا قيادات و ليهم اتباع و نفوذ و الناس تمجدهم و انهم اتحالفوا مع الرومان علشان يشغلوا اليهود
فللاسف بطرس هيهدلك كل ده
بطرس مش بس مات فقير و بيتنقل من بلد لبلد و معندهوش املاك و نفوذ
ده التقليد اللي سلمه بطرس الرسول لينا مقدمش نفسه حتي علي انه قائد ديني
ما هو مش منطقي اقول علي نفسي اني كنت شكاك و متخاذل و مش فاهم رسالة المسيح ولأخر يوم في السجن كنت عايز اهرب
و حتي في اجتماع الكنيسه كانت السلطه للمجمع مش للرسول الاكبر ...لأ ده كمان يروح يبشر في روما و يستشهد في روما
في الواقع لا يوجد تفسير منطقي لأيمان و تضحيات الرسل غير انهم شهدوا قيامه حقيقيه لشخص يسوع الناصري
من الاخ المحبوب Constantine Theodosius
اكتب رأيك في هذه المقالة