هل ممكن الشيطان يخدع البشر و يظهر فاكتر من شكل و منها شكل ملاك ؟ و ايه معني كلمة ملاك الرب في الكتاب المقدس ؟
الموضوع ده حساس بجد ، لأن الشيطان ممكن يظهر بأشكال تخدع الناس، وده بيأكد كلام القديس بولس الرسول :
"وَلاَ عَجَبَ. لأَنَّ الشَّيْطَانَ نَفْسَهُ يُغَيِّرُ شَكْلَهُ إِلَى شِبْهِ مَلاَكِ نُورٍ!" (2 كو 11: 14).
عشان نميز إذا اللي بنشوفه هو من الله ولا لا، فيه كام نقطة نقدر نراعيها:
التوافق مع الكتاب المقدس : لازم اللي نشوفه أو نسمعه يكون متوافق تمامًا مع تعاليم الكتاب المقدس. الله مش ممكن يطلب حاجة تخالف وصاياه. زي ما الرسول يوحنا بيقول: "لا تصدقوا كل روح، بل امتحنوا الأرواح: هل هي من الله؟" (1 يوحنا 4: 1).
السلام الداخلي : الله دايمًا بيجيب سلام وطمأنينة، حتى في المواقف الصعبة. الشيطان، بالعكس، بيجيب خوف واضطراب.
الأعمال والثمر : زي ما المسيح قال: "من ثمارهم تعرفونهم." (متى 7: 16). الروح القدس بينتج ثمار الروح (غلاطية 5: 22-23)، لكن الشيطان بينتج اضطراب وشك.
أما بالنسبة للسؤال عن "ملاك الرب" في العهد القديم فا التفسيرين مش بيتعارضوا ابدا :
ملاك الرب ساعات بتيجي بمعني انه مجرد ملاك مرسل من الله زي ما شفنا في قصص كثيرة في الكتاب المقدس.
في أحيان تانية، العبارة "ملاك الرب" كانت تُستخدم كظهور لله نفسه، اللي هو المسيح قبل التجسد. ده حصل مثلاً في قصة ظهور الله لموسى في العليقة في سفر (خروج 3: 2)، وكان الظهور ده إعلان عن حضور الله شخصيا.
فالصح هو أن كل حالة لازم تتفهم في سياقها. بعض الأحيان بيكون ملاك، وأحيان تانية بيكون ظهور لله بنفسه
اكتب رأيك في هذه المقالة